Սոմելյեի խորհուրդը․ Երևանի լավագույն գինու բարերը

Հին Երևանի պատմական կենտրոնում թաքնված է յուրահատուկ մթնոլորտով ու հմայքով լի գինու բար։ Decant-ի պատերի ներսում հավաքված է հայկական գինիների ամենամեծ և բազմազան հավաքածուներից մեկը։ Բացի այդ, սա Երևանի առաջին և այս պահին միակ վայրն է, որտեղ ներկայացված են տեղական գինիներ՝ իրենց ամբողջական վինտաժային փայլով։ Այստեղ կարելի է գտնել նույնիսկ հազվագյուտ, գրեթե թանգարանային արժեք ունեցող հայկական գինիներ։

Բարի մենյուն ներառում է նաև արտասահմանյան բրենդների հետաքրքիր ընտրանի, շամպայնների տպավորիչ հավաքածու՝ ավելի քան 45 տեսակ, նաև անընդհատ թարմացվող գինիների ցանկ՝ մատուցվող բաժակներով։

Decant-ի առանձնահատկությունը տարբեր ձևաչափերի գինու միջոցառումներն են՝ ուղղահայաց և հորիզոնական դեգուստացիաներ, հանդիպումներ գինեգործների հետ, ինչպես նաև գինու կազինո։ Բարը հաճախ համագործակցում է տարբեր նախագծերի հետ՝ կազմակերպելով համադրություններ՝ գինի և ղապամա, գինի և տոլմա, գինի և սուրճ, հաց, արվեստ, ճարտարապետություն, դասական երաժշտություն, ֆլորիստիկա։

Որպեսզի գինու մշակույթը չսահմանափակվի միայն բարի պատերի ներսում, Decant-ը առաջարկում է գինու քեյթերինգ և սոմելյե տանը ծառայությունը։

Երևանի առաջին և ամենաիկոնիկ գինու բարը, որը հիմնադրվել է 2013 թվականին։ Հենց այստեղից էլ սկսվեց Սարյան փողոցի վերածումը գինեսերների և զբոսաշրջիկների համար իսկական մեքքայի։ In Vino-ն ունի գինիների հսկայական հավաքածու (ավելի քան 1000 տեսականի), բաժակով տարբերակների հետաքրքիր ընտրանի, հեղինակային թեթև նախուտեստներ, հարմարավետ ամառային տեռասա և հանդիպումներ գինեգործների հետ։

In Vino-ն իսկապես դարձել է քաղաքի գինու մշակույթի հիմնական շարժիչ ուժերից մեկը։ Այստեղ ուշադրություն են դարձնում ոչ միայն այն բանին, թե ինչ գինի խմել, այլ ինչպես այն ճիշտ անել՝ ինչ բաժակից, ինչ ջերմաստիճանի տակ, ինչպես մատուցել և համտեսել։ Եթե սիրում եք աշխույժ մթնոլորտ, անսպասելի հանդիպումներ և նոր հաճելի ծանոթություններ, ապա անպայման արժե In Vino-ում անցկացնել գոնե մեկ երեկո։

Ակնկալել բարձրակարգ սպասարկում, նրբաճաշակություն և շքեղություն՝ հաստատ Gini Pig-ի մասին չէ։ Փոծարենը այստեղ դուք կգտնեք ջերմ, կամերային մթնոլորտ, հենց սեփականատիրոջ կողմից թխված թարմ պիցցա, բացառապես հայկական գինիներ՝ շեշտը դնելով բնականության և բուտիկական արտադրողների վրա, ինչպես նաև անկաշկանդ ուրախություն։

Երբ սեփականատեր Դարեն վերադարձավ Ավստրալիայից և որոշեց բացել գինու բար, նա պատկերացնում էր տնական, պարզ ու բարեկամական տեղ՝ փոքրիկ ավտոտնակ Երևանի պատմական կենտրոնում, որտեղ միշտ կլինի ջերմ մթնոլորտ, ամենաթարմ պիցցան, սուրճ և շատ ու լավ տեղական գինի։ Բարը հատկապես սիրվել է Ամերիկայից, Ավստրալիայից և Եվրոպայից եկած հյուրերի կողմից։ Այստեղ պրոֆեսիոնալ սոմելյե չկա, բայց թիմը լավ է տիրապետում գինիների տեսակներին ու ոճերին և միշտ կարող է խորհուրդ տալ ինչ-որ հետաքրքիր բան։

Երևանի ամենաերիտասարդ գինու բարը (բացվել է 2024-ի գարնանը), որը շատ արագ դարձել է սիրելի վայր թե՛ տեղի բնակիչների, թե՛ զբոսաշրջիկների համար։ Urban-ում ներկայացված է հայկական և միջազգային գինիների մեծ ընտրանի, լիարժեք խոհանոց՝ միջերկրածովյան շնչով և հեղինակային հետաքրքիր ուտեստներով, շատ գեղեցիկ ինտերիեր և հյուրընկալ անձնակազմ։

Բարում աշխատում է պրոֆեսիոնալ սոմելյե, ով հպարտորեն կներկայացնի հարուստ գինու ցանկը և հմտորեն կընտրի այն, ինչ կհամապատասխանի ձեր տրամադրությանը։ Urban-ը հրաշալի տարբերակ է ընտանեկան ընթրիքի, ընկերական հանդիպումների և ռոմանտիկ ժամադրությունների համար։ Վստահ եմ, գինեսերները կգնահատեն այս խորհուրդը։

Երևանի հիմնական գինու բարերով բարհոփփինգից հետո կարող եք այցելել նաև ռեստորաններ, որոնք ունեն հրաշալի մենյու, հարուստ գինու քարտ և պրոֆեսիոնալ սոմելյե։ Այդպիսի նախագծերից կարելի է հպարտությամբ նշել Mina ռեստորանը, որը գտնվում է հենց Սարյանի գինու փողոցում, ինչպես նաև նրբաճաշակ La Piazza ռեստորանը՝ Հյուսիսային պողոտայում։ Պուշկին փողոցում գործում են երկու նշանակալի վայրեր՝ բազմազան և նրբաճաշակ գինու քարտերով՝ Como և Collective Yerevan։