Սեղան մեկ հոգու համար․ որտեղ ժամադրվել ինքներդ ձեզ հետ

Հաջողված վայր Երևանի կենտրոնում՝ ինքներդ ձեզ հետ փոքրիկ դադար վերցնելու համար։ Կարող եք նստել բարում՝ մի բաժակ սուրճով, կամ վայելել խմիչք շատրվանի մոտ գտնվող տեռասում․ երկու տարբերակն էլ հավասար հաճելի են։ Մենյուն իտալական պատմությունների հավաքածու է՝ պաստաներ ու պիցցա, անտիպաստի և տիրամիսու։ Իսկ Storia-ի բարի մենյուն առաջարկում է յուրօրինակ ըմպելիքներ սոլո-ռոմանտիկների համար. վարդագույն փրփուրով կապուչինո, սուրճ` լիմոնչելոյով, ջելատո-կոկտեյլ` ապերոլով, ելակով սպրից և ազնվամորով ջին-տոնիկ։

Սրճարան-հաբ, որը ծնվել է լեգենդար Jazzve-ի տեղում։ Սա ոճային լոֆթ է՝ գրքերով, վինիլներով, ծաղիկներով և կենտրոնում աչքի ընկնող տուֆից պատրաստված բարով (հենց այստեղ էլ նստեք)։ J Space-ում հեշտ է «անհետանալ» մի ամբողջ օր․ մտնում ես նախաճաշելու և ավազի վրա եփած սուրճ վայելելու, մնում ես աշխատելու կովորկինգում, հետո ձեռքդ անպայման կհասնի կացու-սենդվիչին կամ տրյուֆելային պաստային, այնուհետև՝ կոկտեյլին, իսկ երեկոյան էլ արդեն սկսվում է DJ-սեթը։

Հյուրնկալ, մոնոխրոմ-բեժ սրճարան՝ երկար սոլո-նախաճաշերի համար։ Հատկապես հաճելի է նստել մեծ բազմոցի անկյունում, ձեռքիդ` մանդարինի ու թխվածքաբլիթի համով ռաֆ, կողքիդ գիրք, ու կանգնեցնել ժամանակը։ Առավոտյան մենյուն հասանելի է մինչև 16։00․ անպայման փորձեք իրենց ծնեբեկով բենեդիկտը, ծովախեցգետնով բոուլը, մորտադելլա-սենդվիչը կամ Kinder-սոուսով նրբաբլիթները: Jam-ը նաև բաց է չորսաթաթ ու պոչավոր հյուրերի համար, այնպես որ ձեզ կուղեկցեն ոչ միայն մտքերը, այլև հարևան սեղանի շները։

Zoie-ն ձեր ժամադրությունն է Միջերկրականի հետ՝ Կասկադի ստորոտում։ Նստեք բարում՝ ուղիղ խոհանոցի դիմաց, գաստրո-թատրոնի առաջին շարքում, ու պատվիրեք սուվլակի, ծովամթերքով օրզո, գառան մսով ու ապխտած ֆետայով պաչերի կամ խենթացնող սպագետտի՝ ծովախեցգետնով։ Ձեզ կընկերակցի փրփրուն կոկտեյլը, իսկ քաղցր ավարտին սպասում են նրբահամ շոկոլադե ձիթապտուղներ։ Zoie-ում ինքներդ ձեզ հետ անցկացրած երեկոն աննկատ վերածվում է փոքրիկ տոնի։

Վայր, որտեղ կարող եք բաց թողնել ձեր ներքին ֆրանսիացուն և ժամադրվել ինքներդ ձեզ հետ՝ #guiltypleasure նշումով։ Gustav-ում Փարիզյան բիստրոյի նրբագեղ մթնոլորտը համադրվում է գայթակղիչ ու հյութալի ուտեստների հետ։

Ձեր սրտի առաջին հավակնորդը բուրգերն է․ փորձեք French Gourmet Burger-ը՝ գրույերով ու կարամելացված սոխով, կամ Truffle Bacon Burger-ը՝ բեկոնով ու տրյուֆելային սոուսով։ Անպայման փորձեք նաև Gustav Pan-ը՝ հեղինակային թավա-ուտեստ, որտեղ դուք եք որոշում՝ իշխանի ֆիլե, հավի կրծքամիս թե տավարի միս՝ 30 խոտաբույսերով հարուստ սոուսի մեջ

Իսկ եթե պատրաստ չեք ծանր ընթրիքի, հիշեք ֆուդփեյրինգի դասական կանոնը․ շամպայնը կատարյալ համադրվում է կարտոֆիլի ֆրիի հետ։ Gustav-ում էլ այն մատուցվում է իր ողջ փառքով՝ տրյուֆելով ու պարմեզանով։

Վայր՝ վեհ մտքերին տրվելու կամ կյանքն ինքնաբուխ տոնելու համար։ Ինտերիերը բալանսավորում է նրբաճաշակ շքեղությունն ու գրեթե տնային հարմարավետությունը, իսկ բաց խոհանոցը հնարավորություն է տալիս հետևել խոհարարներին աշխատանքի ընթացքում։ Ճաշացանկում՝ միջերկրածովյան նախուտեստներ, պաստաներ ու գրիլ, նեապոլիտանական պիցցա և տպավորիչ ֆոկաչչա՝ ձկնկիթով։

Բայց գլխավոր գոհարն, իհարկե, գինու սենյակն է․ զով ու լեցուն հավաքածու, որտեղ սոմելյեն կօգնի ընտրել օրվա գինին՝ ձեր տրամադրությանը համապատասխան։ Երեկոյի ընթացքում բաժակը երբեք դատարկ չի մնում․ այստեղ դրան հետևում են նույնիսկ ավելի ուշադիր, քան դուք։