Հասցնել 24 ժամում. Երևան

Gallia

Պուշկինի փողոց 40 հասցեում գտնվող հարմարավետ տարածքում միաժամանակ տեղավորվել են Collective խմբի երեք հաստատությունները։ Առավոտյան մեզ հետաքրքրում է Gallia-ն և նրանց վաղ նախաճաշերը։ Բաղադրատոմսերը՝ առանց անակնկալների․ օմլետներ, տոստեր, կրուասաններ՝ բայց գեղեցիկ ձևավորմամբ և առավոտյան 7:00–ից։ Եվ այս ամենը՝ AfroLab Roastery-ի օրինակելի սուրճի ընկերակցությամբ (ևս Collective խմբի մաս է)․ աէրոպրեսս, պուրովեր, ֆլեթ ուայթ՝ ամեն ինչ բարձրակարգ է։

Լոկացիան արժե պահպանել․ Gallia-ում նաև ճաշն ու ընթրիքը խոստանում են լինել ոչ ձանձրալի, իսկ էսթետիկ Minas բարում երեկոյան խառնում են հեղինակային կոկտեյլներ՝ զուգորդված նախուտեստների հետ։

Այս վայրը ամբողջ օրվա համար է, բայց սկսենք հաճելի նախաճաշից։ Առավոտյան 8:30–ից Corpous-ում առաջարկվում է մոտ տասնյակ գեղեցիկ և հասկանալի բաղադրատոմսեր՝ օրինակ խավիարով և սաղմոնով նրբաբլիթներ, բենեդիկտներ, շիլաներ և օմլետներ։ Բացի այդ՝ լավ սուրճ կամ մեկ բաժակ փրփրուն գինի․ վերջիվերջո մենք հեդոնիստ զբոսաշրջիկներ ենք։ Ցերեկը և երեկոյան այստեղ մատուցվում է ակտուալ խոհանոց՝ թարթարներից մինչև սթեյքեր, ինտերիերը ֆոտոգենիկ է, իսկ թիմը՝ բարեհամբույր օրվա ցանկացած ժամի։

Օրվա ընթացքում սրճային «վերալիցքավորումները» շատ էին, բայց թեմայի ֆավորիտը մնաց AfroLab-ի Costa Rica La Peña ֆիլտր սուրճը․ հենց այս հատիկները կարող են դառնալ հիանալի հուշանվեր Երևանից։ Լավ սուրճ պատրաստում են նաև հարմարավետ J Space-ում ՝ մի փոքր աշխուժանալուց հետո այստեղ կարելի է մնալ թե՛ ճաշի, թե՛ կոկտեյլի, թե՛ դիջեյ-սեթի համար․ բազմաֆորմատ տարածք։ Fein-ում և 202°f-ում նույնպես կարելի է գտնել երազանքի սուրճ, իսկ նրա հետ՝ ինչ-որ բան խմորեղենից կամ հետաքրքիր դեսերտներ։

Թանգարանները, իհարկե, լավ են, բայց գինեգործարանը… Դա միաժամանակ պատմության, մշակույթի և գինու մասին է։ Եվ ընդամենը 40 րոպե մեքենայով քաղաքի կենտրոնից, ուստի շտապ պատվիրում ենք տաքսի։

Van Ardi-ի պատմությունը սկսվում է 2008 թվականից։ Այդ ժամանակ Վարուժան Մուրադյանը թողեց հաշվապահի աշխատանքը՝ հիմնելու համար Հայաստանի առաջին օրգանական գինեգործարաններից մեկը։ Այսօր նրա «զինանոցում» կան ինը գինիներ, գեղատեսիլ խաղողի այգիներ և փոքր արտադրություն, որտեղ մշտապես հնչում է դասական կամ եկեղեցական երաժշտություն։ Նրա վիբրացիաները բարենպաստ ազդեցություն են ունենում յուրաքանչյուր շշի վրա, իսկ հյուրերին նույնիսկ խնդրում են հարվածել զանգին՝ իրենց ներդրումն ունենալով հայկական գինեգործության մեջ։

Հիմնական ծրագրում ներառված է շրջայց և պատմություն գինեգործարանի մասին, իսկ հավելավճարով կարելի է պատվիրել ջերմ հայկական ճաշ։ Արժեքը՝ 5 000–19 000 դրամ։ Ավելի լավ է տեղերը ամրագրել նախապես։

Գաստրոաշխարհայացքը զարգացնելու և որակյալ ընտրանի կազմելու համար մեր խմբագիրը իրականացրել է վերահսկիչ «կլանում»՝ երեք ռեստորաններում երեք բաժին տոլմա։ Ընտրեք ցանկացածը կամ բոլորը միանգամից։

Առանց ավելորդ պաթոսի, բայց նշանավոր վայր՝ պատմությամբ և գրեթե տնային հարմարավետությամբ։ Այստեղ կարող եք փորձել օրինակելի տոլմա՝ ութ պինդ, հիանալի պատրաստված տոլմա 2 600 դրամով։ Հայկական խոհանոցի ամբողջ այբուբենը՝ ավելուկով ապուրից մինչև գրիլ արված իշխան՝  նույնպես տեղում։ Ամբողջ օրվա ընթացքում կրակի վրա տապակում են միս, որն արժանի է առանձին ուշադրության։

Վայրը մի փոքր ավելի շքեղ է, բայց դեռևս առանց ավելորդ փայլի։ Տոլմային այստեղ նվիրված է առանձին բաժին․ կա դասական տարբերակ, կիմչիով, բադով և նույնիսկ ռոլլերի ձևով։ Բոլոր ուտեստների գները ադեկվատ են, ներառյալ քյուֆթան, գրիլի վրա պատրաստված միսը և հագեցած ապուրները։ Բաժակներով գինիների ընտրանին համեստ է, բայց ինչու մանրանալ, եթե կարելի է վերցնել շշով։

1998 թվականին բացված «Դոլմաման» զբոսաշրջային ուղեցույցներից հայտնի վայր է, որը գրավում է իր մթնոլորտով․ վինտաժ ինտերիեր, երաժշտություն՝ ասես գրամոֆոնից, հատակի ճռճռոց։ Իր ժամանակին այստեղ ճաշել են Քիմ Քարդաշյանը, Մայքլ Քեյնը և Ջորջ Քլունին։ Հուսանք՝ նրանք գնահատել են տեղական տոլման՝ ընտրանու ամենաթանկը․ վեց հատը՝ 7 000 դրամ։ Ցանկում կան նաև ժամանակակից բաղադրատոմսեր, օրինակ՝ խաշլամա վերմուտով և սերուցքով։

Ջերմացնող խաշի և խորովածի հետևից (այո, «Արարատ»-ի բաժակի հետ) մեր երթուղին կառուցում ենք դեպի «Երևան» պանդոկ։ Քաղաքում կան մի քանի մասնաճյուղեր, բայց մենք երաշխավորում ենք Ամիրյան 5 հասցեում գտնվողի գունեղ մթնոլորտը։ Այստեղ սնվում են թե՛ ծեր ու երիտասարդ, թե՛ տեղացի ու զբոսաշրջիկ․ հարմար և ուրախ է բոլորին։ Երբեմն լինում են պարեր և կենդանի երաժշտություն։

Ակտիվ ու եռանդուն վայր է, ուր ուրբաթ երեկոյան առանց ամրագրման կարելի է մտնել միայն շատ «գեղեցիկ աչքերի» շնորհիվ։ Այստեղ կա շշերով գինիների լավ ընտրանի, իսկ բաժակներով միշտ լցվում է ինչ-որ հետաքրքիր բան․ օրինակ՝ Geghani-ի խորհրդավոր տեղական միլաղը խիստ խորհուրդ է տրվում՝ խելամիտ օգտագործմամբ։ Urban-ի մենյուում հավաքված են տեղական և միջերկրածովյան սպեցիալիտետներ, իսկ ձեր ուշադրությանը միանշանակ արժանի են խելահեղ ֆոկաչչան և թարթարը։

Բարի գիշերվա և Երևանի առողջության համար՝ մեկ բաժակ հայկական փրփրուն գինի Keush Decant բարում։ Սա Երևանի գինու քարտեզի կարևոր կետերից է։ Երեկոյան այստեղ մարդաշատ է, այցելուները՝ կրեատիվ, մթնոլորտը՝ ընկերական, առանց պաթոսի ու փայլի։ Բաժակներով մշտապես բացված են մոտ տասնյակ շշեր, որոնց հետ առաջարկում են փոքր խորտիկներ։ Ցանկության դեպքում սոմելյեները կանցկացնեն փոքր շրջայց-դեգուստացիա՝ հայկական գինեգործության շուրջ։

Կեսգիշերյան քաբաբի, խորովածի կամ հագեցած ապուրի համար սպասում են «Արտաշի մոտ»։ Ներսում ամեն ինչ պարզ է, բայց ափսեներում՝ մաքուր լյուքս՝ բարեհամբույր գներով։

Լուսանկարներ․ ռեստորանների կայքեր և սոցիալական ցանցեր, հեղինակի անձնական արխիվ, Yandex Maps