Ultima Guide 2026: shaharning eng yaxshi restoranlari uchun ovoz berish boshlandi
Bu yil Toshkent bo‘yicha ikkinchi Ultima Guide nashr etiladi: birinchi texnologik gastronomik gidga kirgan top-20 restoran 2025 yil 22-may kuni Hilton Tashkent City’da e’lon qilingan edi. Bu qanday o‘tgani haqida batafsil ushbu maqolada o‘qish mumkin.
Gid avvalgidek bir necha bosqichda shakllantiriladi:
Avvaliga neyrotarmoq Toshkentdagi 3 000 ta muassasani 100 dan ortiq mezonlar asosida tahlil qildi. Ular orasida tashriflar va taksi safarlari orqali aniqlangan ommaboplik, yuqori baholar va sharhlar sifati bor. Shu bilan birga, muassasa Yandex xizmatlari bilan ishlaydimi yoki yo‘qmi — bu muhim emas.
Keyin uch oydan kam faoliyat yuritayotgan loyihalar, shuningdek klassik barlar, kofe do‘konlari, fуд-mollar va tarmoq restoranlari chiqarib tashlandi — bu formatlar uchun alohida yondashuv va boshqa baholash mezonlari kerak. Natijada 183 ta restorandan iborat ro‘yxat shakllandi — aynan shu ro‘yxatdan foydalanuvchilar va ekspertlar eng yaxshilarini tanlaydi.
Baholash mezonlari aniq va tushunarli:
- Taomlar: menyu konsepsiyasi, mahsulotlarning yangiligi, ta’mi va taqdimoti;
- Qulaylik va atmosfera: shovqin darajasi, o‘tirish zichligi;
- Xizmat: xodimlarning muloyimligi va e’tiborliligi, ofitsiant tavsiyalarining sifati, xizmat ko‘rsatish tezligi;
- Interyer: dizayndan tortib idish-tovoqqacha;
- Bar menyusi: ichimliklar konsepsiyasi va ta’mi.
Foydalanuvchilar faqat oxirgi bir yil ichida Yandex xizmatlari orqali o‘zaro aloqada bo‘lgan restoranlargagina ovoz bera oladi — ovoz berish Yandex Go mobil ilovasidagi havola orqali 17-martgacha davom etadi. Shu bilan birga ekspertlar ham ovoz beradi: mahalliy restavratorlar, oshpazlar va gastro-inflyuenserlar.
Yakuniy natijalar Ultima Guide uchun maxsus ishlab chiqilgan baholash modeli orqali hisoblab chiqiladi, natijalar esa xalqaro konsalting kompaniyasi «Yakov va Partnerlar» tomonidan tekshiriladi. Toshkentning eng yaxshi restoranlari 2026 yil o‘rtalarida tantanali marosimda e’lon qilinadi.