Табиғат аясында: қаладағы күйбелеңнен алшақта орналасқан 8 мейрамхана

Орталықтан ~ 15 минут жерде 

Алматының төңірегінде тау жолдарының көп екені баршаға мәлім. Ал суқоймалар ше? Сарқыраған судың даусын естігіңіз келсе, Тереңқұр соқпағымен серуендеп қайтыңыз. Тау өзенінің жағасында жүгіруге шыққан спортсүйерлерді де, иттерін серуендетуге шыққан жандарды да, қиялға берілген ғашықтарды да көруге болады. «March march» деген жазуы бар кішігірім үйге тоқтауды ұмытпаңыз: онда кофе немесе шай ішіп, тәтті снек немесе бәлішпен жүрек жалғап, естелікке айнаның алдында суретке де түсіп алыңыз. Әр мезгілдің өз рақаты бар: қыста алауошақтың жанында жылынып, жазда — өзен жағасында отырып, табиғатқа тамсана аласыз.

Орталықтан ~ 20 минут жерде

Есентай өзенінің әл-Фараби даңғылынан жоғарғы жағында көздің жауын алатын әдемі жол бар екенін екінің бірі біле бермейді: күн ашық болғанда мұндағы тау көрінісі ап-анық боп көрінгені соншалық — оның әрбір бедерін, әрбір тасын қолмен ұстап көруге болатындай. Бұл жолда жападан-жалғыз тұрса да, келушілер саны үзілмейтін Ozen кофеханасын көресіз. Мұнда таңғы, түскі және кешкі асқа жаныңыз қалағанның бәрі бар: ақсерке қосылған кәді драниктерінен бастап тойымды пасталарға дейін. Асығыс болсаңыз — батч-брю немесе көк матчаны өзіңізбен бірге алып, әрі қарай серуендей беріңіз. Жол-жөнекей әсем көріністерді естелікке суретке түсіруді ұмытпаңыз.

Орталықтан ~ 35 минут жерде

Жылқы десе ішкен асын жерге қоятын жылқықұмар жандарды қала сыртындағы Haragun клубының аумағында нағыз кантри атмосферасы күтіп тұр. Мұнда атқораны, сурет өнерінен шеберлік сағаттары немесе арт-галереяны, ал жазда — көгалда жайғасқан ашық аспан астындағы кинотеатрды көруге болады. Қарныңыз аша қалса, шағын ипподромның жанынан кетпей-ақ әлденіп алыңыз. Мәзірде фермалық қозы етінен жасалған тағамдар, теңіз өнімдері, итальяндық асхана, жапондық вагю, американдық стейк сияқты сан түрлі тағамдар бар. Ал шарап картасынан қазақстандық өнімдер, шампанның ондаған түрі, үйреншікті «Новый Свет» және тіпті еуропалық Гран Крю шараптары да табылады. Осының бәрін терезенің арғы жағындағы аттың дүбірі толықтыра түседі. Әттең, ковбойлардың қалпағы мен өкшелігі бар өрнекті етік қана жетіспей тұр.

Орталықтан ~ 35 минут жерде

Condé Nast Traveller және Lonely Planet халықаралық басылымдарына ең қызықты жерлердің бірі ретінде кірген Қазақстан елі және ондағы Auyl мейрамханасы саяхатқұмар шетелдіктердің кейбірі үшін алыстағы арман болса, алматылықтарға ол — қол созым жерде. Медеу шатқалында жайғасқан мейрамхананың интерьеріндегі табиғи материалдар мен реңктер, таза ауа (алматылықтар үшін нағыз байлық) және көз жауын алатын көрініс — Auyl мейрамханасында жаныңыз да, тәніңіз де тынығады. Бейклассикалық ұлттық асхана көшпенділердің қолданған әдіс-тәсілдері мен дәстүрлеріне сүйене отырып, заманға сай икемделіп жасалған, сондықтан тамақ ауыр болады деп уайымдамасаңыз болады. Сүрленген жылқы еті және ысталған паприка қосылған ачичук салатынан немесе чили қосылған жылқы етінен жасалған авторлық тартардан дәм татып көруге кеңес береміз. Астан соң террасадағы әткеншекте отырып, фирмалық тайга шайын ішіп көріңіз. Алматы жанында осылай бір күндік керемет демалыс жасап алуға болады!

Орталықтан ~ 40 минут жерде

Бағдарды Іле-Алатау ұлттық табиғи паркіне кіретін «Аюсай» визит-орталығынан бастайық. Бұл жерде табиғатқа қол сұқпау концепциясы жайлы пайдалы ақпаратпен танысып, жақын жердегі соқпақ жолдарды өз бетіңізше немесе топтарға ілесіп зерттей аласыз. Ал әрі жүрсеңіз, негізгі құрылыстардан сәл жоғарыда тұрған кішігірім тас үйді көресіз. Бұл Sandyq Group жобаларының бірі — интерьері ұлттық стильде жасалған, қысқа да нұсқа шығыс мәзірі бар, таудағы Shopan дәмханасы. Оның ерекшелігі — бір ғана ыстық тағам, Мерекелік палау. Тәбет ашуға тандыр самсасы, ал астан кейін тәттілер мен шай тартылады. Зәулім таулардың ортасында жылулық пен жайлылық сезіміне бөленіп, жан тыныштығын табыңыз.

Орталықтан ~ 45 минут жерде

Таудың арасында таңғы ас ішіп алып, кішігірім хайкинг жасағысы келгендерге арналған дайын жоспар. Таңертең ерте тұрып, таксиге отырамыз (әлсіреп қалам демесеңіз, жаяу көтерілуге де болады); баратын жеріміз — таңғы 7-ден бастап есігін ашатын Apa Katya дәмханасы. Мәзірде ботқалар, сүзбелі құймақтар, жұмыртқа қосылған түрлі тағамдар, сэндвичтер бар. Өзге қонақтардан оңаша жерде ойыңызды жинақтап, тауға қарап сүйсінем десеңіз, даладағы орындықтардың бірін алып, алшақтау жерге отырыңыз. Тамақтанып болған соң, Медеуге жаяу түсуге болады: жол-жөнекей шатқалға, сарқырамаға және Горельник термалды бұлақтарына соға кетіңіз. Ақыр аяғында елге танымал «денсаулық баспалдағында» төзіміңізді сынап көріңіз — сізді ара-тұра демалатын алаңшалары бар 842 саты күтеді.

Орталықтан ~ 50 минут жерде

Farm to Table — мейрамханалар әлеміндегі танымал концепция: тағамдар тікелей сол аумақта өсірілген немесе тікелей ферма иелерінен жеткізілген жергілікті азық-түліктен әзірленеді. Талғар алабалық шаруашылығының концепциясы бұдан да зор: балықты өзіңіз аулайсыз, ал аспаздар оны пісіріп береді. Балықтардан алабалық немесе бекіре аулауға болады; қармақ пен жемді өздері береді. Осылайша мейрамханадағы жай түскі немесе кешкі ас нағыз сауық-сайранға айналады.

Орталықтан ~ 50 минут жерде

Алматының бір ғажап жері — жұмыстан шыға салысымен Орталық Азиядағы ең биік орналасқан мейрамханаға баруға болады. 3200 метр биіктіктегі Shymbulak Resort саяжайында орналасқан Syn32 мейрамханасына қашан барсаңыз да après ski атмосферасын сезінесіз. Біреулер шаңғы теуіп болып, енді екпінді диджей әуенінің аясында фирмалық қазақтори (жергілікті нақышта әзірленген якитори мини-кәуаптары) жеп күш жинап жатса, ал басқалары арқанжолдан енді түсіп, сүйікті кофесі мен ағылшын таңғы асына асығуда. Егер шаңғы немесе сноуборд ұнамаса, Syn32 мейрамханасында түскі астан кейін Богданович мұздығына дейін жаяу барсаңыз болады. Бұл мәрмәр тәрізді мұзды жартас 3500 метр биіктікте орналасқан, сондықтан барар жолы жеңіл болса да, ауа райына сай киініп, керекті жабдықтарды алуды ұмытпаңыз. Қайтар жолда әлемдегі ең биік орналасқан қонақүйлердің бірі Tenir қонақүйінде қонсаңыз болады.