Мен армандаған балық: 8 сифуд-мейрамхана

Sun Group жарығының астындағы бірегей сифуд

Ең басты мейрамханалық Тұран даңғылындағы отбасылық итальяндық мейрамханалар ортасында «Рыба Пила» — Sun Group Asia холдингінің әдеттегіден өзгеше балық жобасы орналасқан. Бұл жер несімен таңғалдырады? Біріншіден, ерекше ауқымды балық олжасын тураудан бүтіндей бір шоу үнемі болып тұрады — бәріне мәлім тунец балығынан бастап деликатес сүтті акулаға дейін турап, қонақтардың алдында әзірлеп береді. Негізгі мәзірде — таныс рецептер: таңқышаян еті қосылған шауырма, ішіне асшаяндар мен страчателла салынған кутаб, шортан етінен жасалған по-киевски котлеттері. «Рыба Пила» мейрамханасындағы десерттік меню мен бар ерекше назарға лайық: кокостан жасалған мусс пен маракуйя қосылған шоколад қабыршақ таңқурай мен кокос сүті қосылған құлпынай джинінен жасалған Submissive Jellyfish коктейлімен бірге медуза тәріздес стильді бокалға ақ шоколадтан жасалған «теңіз» көбігінің астына салынып тартылады — мұндай тарту бізге қатты ұнайды.

Қызыл кәстрөлдерге салып тартылатын мидиялары бар стритфуд-мейрамхана.

Қара теңіз жағалауындағы киоскіден басталған Сочилік жоба 100+ мейрамханадан тұратын франшизалық желіге дейін өскен. Біздің «Мидийное место» — Қазақстандағы тұңғыш франшиза — Сызықтық саябақтан алыс емес жердегі Europe City ТК-де орналасқан. Жобаның фишкасы — мейрамханалық тамақты стритфуд форматында және қолжетімді бағамен әзірлеу.

Негізін қалаушылардың айтуынша: «Бізде мидиялардың түр-түрі көп емес және үш тұздық бар: кілегейлі сыр, томат және „Том ям“. Бірақ біздегі порцияның үлкендігі соншалық, қонақтар ешқашан аш кетпейді». Біз де солай деп ойлаймыз: көп мөлшердегі тұздықтағы мидиялар салынған фирмалық қызыл кәстрөл мен жасыл май астына салынған үш кесек француз багеті — расымен де мықты және мүлде қарапайым емес түскі ас. Желі мейрамханаларына арналған мидиялар қатырылған күйде Оңтүстік Америкадан әкелінеді; олардан басқа, мәзірде устрицалар, кижуч, ирекшелер мен магадан асшаяндары бар (олар да лимон, майонез және тәтті чилимен бірге мұздатылған тақтаға салынып, әсерлі таратылады).

Түбі Оңтүстік Африкадан шыққан желілік мейрамхана ұсынған теңіз өнімдері қосылған платтерлер.

Ocean Basket-те гастрогеографиядан шағын сабақ алуға болады: бұл отбасылық мейрамханаға теңіз өнімдері Жердің түкпір-түкпірінен — Жапония, Аргентина, Фарер аралдары, Жерорта теңізі, Чили мен Жаңа Зеландиядан әкелінеді. ОАР, Преторияда 1995 жылы құрылған алғашқы Ocean Basket-тен бүгінде әлемнің 25 елінде 200+ мейрамханаға дейін дамыған бренд басты құндылықтарын сақтап қалған: қолжетімді бағалармен ұсынылатын теңіз өнімдерінің алуан түрлілігі.

Мәзірдегі сөзсіз бестселлерлер — платтерлердің барлық түрлері; бізге ерекше ұнағандары — лимон-сарымсақ тұздығына салынған чили мидиялары, prince асшаяндары мен кальмалар. Барлық платтерлер өзіңіз таңдауға болатын екі гарнирмен тартылады (редакцияның таңдауы — фирмалық күріш пен кілегейлі асжапырақ).

Ocean Basket-ті тағы не үшін ұнатуға болады? Олар Әлемдік мұхиттағы теңіз тіршілік иелерінің популяциясын қадағалап отыратын SASSI (Southern African Sustainable Seafood Initiative) ұйымымен қызметтес. Бұл мейрамхана өз тағамдарында Қызыл тізімдегі теңіз өнімдерін қолданбайтынын білдіреді: мысалы, мәзірден сіз жоғалып кету қаупі бар жыланбалықты таппайсыз.

Президент саябағына қарама-қарсы орналасқан балық, устрицалар мен шарап теңізі

«Море Море» мейрамханасына барудың басты себебі — мұздықтардан әкелінген балғын балық пен теңіз өнімдері. Өнімдер Шри-Ланка, Түркия, Канада мен Францияда аптасына екі рет жеткізіліп тұрады. Грильге піскен ред снеппер мен барабулька; тұздалған дораба мен сибасты татып көруге кеңес береміз. Мәзірдегі ерекше назар raw-барға бөлінген: мұнда әртүрлі нұсқадағы татаки мен тартарлар, роллдар, гункан мен нигирилер бар.

«Море Море» интерьері теңіз тақырыбын білдіретін бірқалыпты сарғыш реңкте орындалған: жаныңыздан сардиналар үйірі жүзіп өтеді, үстелдердің үстінде тұрған абажурлар теңіз қабықшаларын еске салады, ал қабырғалардағы алтын балықтар күн сәулесінен жарқырап тұрады — атмосфера деген құлпырып тұр.

Хокку арнағың келетін сифуд-асхана.

St. Regis қонақүйінде орналасқан шағын паназиаттық асхана мейрамханасы. Asakusa бізге өзінің ұстамды мәзірімен ұнайды. Әрбір блоктағы позициялардың саны бесеуден аспайды, әрбір тағам кездейсоқ емес және ұсақ-түйегіне дейін ойластырылған деген әсер қалдырады. Тіпті сипаттамаларының өзі хокку тәріздес: «юдзу-понзу және шнитт-пияз қосылған алауға күйдірілген тунец татаки» — гастропоэзия десе болады.

Жапондық дәстүрлерге сүйеніп әзірленген теңіз өнімдерінің негізінде де минимализм байқалады. Оған қоса, мәзірдегі тағамдар да әзірлеу тәсілдері бойынша жіктелген: робата да (дәстүрлі жапондық грильде әзірленген), якимоно да (көмір немесе ашық алауда әзірленген), raw да (шикі түрде) бар.

Итальяндық бояу сіңген теңіз өнімдері

Сарайшық пен Қабанбай батыр көшелерінің қиылысында жайлы отбасылық Osteria Luce мейрамханасы орналасқан, бұл дәстүрлі пасталары мен пиццалары бар итальяндық мейрамхана болса да, теңіз өнімдеріне ерекше назар бөлінген. Сөзімізге дәлел — ортасындағы сан түрлі француз устрицалары бар акважүйе. Одан әрі — одан да көп: лобстер, теңіз өнімдері қосылған ризотто ливорнезе, камчатка таңқышаяны қосылған спагетти, теңіз өнімдерінен жасалған соте, грильде дайындалған тұтас сибас немесе дорада — тапсырыс беріп, Сицилиядағы кешкі асты елестетіп көріңіз.

Osteria Luce шарап картасы егжей-тегжейлілігімен, толыққанды рейтинг таңбаламасымен, гастоүйлесімдер және жасалған аймақтарымен таңғалдырады. Алуан түрлілігі де қалыспайды: шымырлы шараптан тыныш шарапқа дейін, Италиядан Австрияға дейін, шөлмектер мен бокалдар, ақ пен қызғылт, құрғақ және тәтті, классикалық және, тіпті, алкогольсіз шараптарға дейін.

Әсерлі түрде тартылған теңіз өнімдерінен жасалған соте

Жұмақ бақтарын меңзейтін пальма мен гүлдер бейнеленген шұбар түстес қабырғалар «Белый лотос» сериалының ішінде отырғандай әсер қалдырады. Мәзір сюжеттері де қызық. Теңіз өнімдерінен жасалған сотені тарту ерекше еліктіреді: тұздыққа салынған мидиялар, кальмарлар мен асшаяндар порциясын қонақтың алдында жатқан үлкен тақтаға шелектен ептеп түсіреді — ондайды TikTok-тан көрген де шығарсыздар. Мәзірдегі үлкен бір блок фирмалық сотеге арналған; патшалық сотеге назар аударыңыз — камчатка таңқышаяны, стригун-шаян, сегізаяқ, лобстердің құйрығы, патша асшаяндары, мидиялар, вонголе, шаяндар мен кальмарлардың қомақты фалангалары таңдауға болатын тұздықтармен ұсынылады: фирмалық азиялық, карри-манго, кілегей немесе том ям. Бұл теңіз мерекесі 4–6 адамға арналған, бірақ одан аздау порциялар да бар — жұптар мен жалғыз өзі келген жандарға арналған комбо. Vincent мәзірінің қалған бөлігі теңіз мейрамханасында кездесетін нәрсенің бәрін дерлік қамтиды: жолбарыс асшаяндары, қытырлақ сегізаяқтар, тунецтен жасалған тартар мен ақсерке стейктері.

Шардарадан ауланған тірі балық

Жаңа пісірілген балықты байқап көруге болатын біздің тізімдегі ең қолжетімді орын. Бұл қалалық дәмхананың қала ішінде үш филиалы және флагмандық позициясы — қуырылған сазанды жеткізу сервисі бар. Оны жаңа ауланған күйде Шардара су қоймасынан (Түркістан облысы, Сырдария өзені) әкеледі, арнайы резервуарларда сақтап, мейрамханаға бассейндері бар жүк көліктерімен әкеледі, аулайды және тапсырыс жасалған кезде турайды. Сазанды тек тұтас күйде тартады, сондықтан бұл кербезді асап жеу үшін бір топ адам болып келуге кеңес береміз. Форматы біршама қарапайым — әзірлеу кезінде дәмдегіштер қолданбай, тек тұз бен ұн қолданылады; қытырлақ, сөлді және сүйектері аз деп сендіреді.