Ultima Guide пайдаланушыларының таңдауы: сәнді, заманауи, жастарға жақын
Koktem, Et-Et және Sushië қалалық жобаларын жасаған команданың Оңтүстік Корея асханасына арналған кафесі. Тұжырымдаманың негізінде — Сеул көшелерінен қалалық кафенің көпшілікке түсінікті әрі жақын форматына көшірілген танымал стритфуд. Мәзірде кимпабтың сегіз түрі, токпокки мен яннём ұсынылады. Алайда Peek-a-boo-дың басты ерекшелігі — қазіргі корей поп-мәдениетімен тығыз байланысы. Кафе арнайы мәзірлер мен тақырыптық сусындарды жиі ұсынады: мысалы, Blackpink тобының мүшелеріне арналған топтамалар шығарған. Ал әлеуметтік желілерінде белгілі бір тағамдармен бірге тамашалауға болатын дорамалар тізімін жариялап отырады. Орташа чек көлемі бойынша Peek-a-boo мейрамхана сегментіне жақын: кукси 3 690 теңге, кимпабтар 2 890 теңгеден басталады. Биыл жоба Ultima жүлдесінің «Пайдаланушылар таңдауы» арнайы марапатына ие болды.
Грильді дастарқан басында өзіміз жағамыз
Алматылық ерлі-зайыпты Павел мен Лариса ашқан отбасылық кафе алғашқы Highvill кешенінде орналасқан. Бұл мекеннің таңдалуында өзіндік мән бар. Кешенді Чхонанның Dongil Highvill компаниясы салған, ал ауданның өзі корей мәдениеті айрықша байқалған алғашқы орындардың біріне айналды: мұнда стритфуд жобаларынан бастап, корей косметикасын сататын жергілікті дүкендерге дейін бар. Kuksishnaya мәзірі үй тағамдарына деген ілтипаттан туған: кимчи, корейше сәбіз бен меги-ча — Сеулдегі әженің үйіне қонаққа келгендей әсер сыйлайды. Ал басты тағамы, атауынан-ақ аңғаруға болатындай, кукси. Оны кеспенің үш түрімен әзірлейді. Бағалары да кафенің қолжетімді бағытын айғақтайды: куксидің бір порциясы 3 400 немесе 3 600 теңге, ал кимпаб 3 000 теңгеден басталады. Отбасымен баруға қолайлы: кішкентай қонақтарға балаларға арналған куксиі бар бөлек мәзір қарастырылған.
Үйдегідей кукси ұсынатын отбасылық орын
Астанадағы корей асханасының алғашқыларының бірі. Korean House 2002 жылы Тұран даңғылындағы мейрамханалар аллеясында ашылып, содан бері Mega Silk Way сауда орталығында тағы бір филиалын іске қосты. Мұнда қонақты табалдырықтан аттаған сәттен-ақ ерекше ықыласпен қарсы алады: негізгі тағамдарға мейрамханадан панчхан тіскебасарлары қоса ұсынылады. Біздің топтамадағы орташа чектің ең жоғары болуы да тегін емес: кукси 3 800 теңге, ал кимпабтар 3 700 теңгеден басталады. Мұндағы түскі және кешкі астың басты қызығы — корей барбекюі. Мәрмәр етті дастарқан үстіндегі грильге өзіңіз пісіре аласыз. Одан кейін асты жалғастыруға арналған дәстүрлі тағамдарға кезек келеді: юккедяннан бастап, түбі қытырлақ күрішті пибимпабқа дейін корей классикасының бәрі бар.
Әлеуметтік желідегі блогтан басталған үй асханасының кафесі
Жобаның тарихы 2018 жылы Эллина Тян әлеуметтік желілерде үйде әзірленетін корей тағамдарының рецептілерімен бөлісе бастаған кезде өрбіді. Кейін шеберлік сабақтары мен дарк-китчен пайда болып, 2022 жылы олар Festival Avenue сауда орталығындағы толыққанды кафеге айналды. Эллина бастапқы идеясын сақтай білген: үйде рецепт бойынша оңай қайталауға болатын, дос-жаран мен жақындарыңа ұсынатын тағамдарды әзірлеу. Панчхан, паджон мен кимпабтар дәстүрлі тукпеги қыш құмыраларында берілетін сорпалармен толықтырылған. Орташа чек бойынша Korean Home Food біздің топтаманың дәл ортасынан орын алады: кукси 3 290 теңге, ал кимпаб 3 490 теңгеден басталады.
Көп жылдан бері жұмыс істейтін фастфуд
Kakao dak ұзақ жылдар бойы ескі Highvill кешенінде, қазіргі Kuksishnaya орналасқан жерде жұмыс істеп, шамамен үш жыл бұрын жаңа Highvill Ишимге көшті. Бұрынғы филиалдың өзіндік тұрақты қонақтары бар еді: орналасқан жеріне байланысты мұнда кешен құрылысымен айналысқан кәрістерді жиі кездестіруге болатын. Бүгінде Kakao dak фастфудқа тән жылдамдығын сақтап қалған. Мәзірі ашылған күннен бері айтарлықтай өзгермеген, ал бағасы топтамадағы ең қолжетімділердің қатарында: кукси 1 950 теңге, кимпабтар 1 250 теңгеден басталады. Корей асханасымен таныстықты осы жерден бастауға болады: өзіндік атмосферасы бар, жылдам, қарапайым әрі қалтаға ауыртпалықсыз.
7/11 немесе CU үлгісіндегі дүкен
Оңтүстік Корея стиліндегі тәулік бойы жұмыс істейтін дүкен бір қарағанда бұл топтамаға үйлеспейтіндей көрінеді: отыратын орындары болғанымен, жеке асүйі жоқ. Есесіне мұнда күнделікті азық-түлік алу TikTok-тағы girl’s dinner хэштегімен шығатын видеолардағыдай толыққанды тіскебасарға оңай айналады. Басты ерекшелігі — рамёнды өз қолыңызбен әзірлеу мүмкіндігі. Оның 50-ден астам түрі бар, ал жанындағы тоңазытқышта түрлі тұздықтар мен топпингтер тұр. Кеспе бөлімінен кейін мұздатқыштарды зерттеуге болады: онда импортталған балмұздақтың 40-қа жуық түрі ұсынылған. Тұжырымдаманың тағы бір бөлігі қазіргі корей поп-мәдениетіне құрылған. Сөрелерден дорамалардан таныс тәттілерді, K-pop-қа тән бірден танылатын безендіруі бар өнімдерді және Оңтүстік Кореяның күнделікті мәдениетіне әлдеқашан сіңіп кеткен басқа да тауарларды табуға болады.
Фото: мейрамханалардың сайттары мен әлеуметтік желілері; Yandex Maps
