Кездесуге баратын жерлер

Бұл — алтын квадрат бойымен жасалған серуенді опера мен балет театрына тамсана отырып, кешкі аспен тәмамдайтын алматылық кездесу. Бұрынғы билет кассасы болған «Афиша» қазір — атауында тарих сарыны бар, ішінде ескі театр плакаттары ілінген, ақ дастарқандар, заманауи қазақстандық суретшілердің картиналары, таңдаулы мәзірі бар мұралы орын. Сүйікті қара көйлегіңізді киюге керемет себеп!

1057 метр биіктікте орналасқан шыны текшеде кештің ерекше болатыны күмәнсыз. Әсерге толы кешкі ас, әсем безендірілген тағамдар, қайда қарасың да — Алматы, таулар, қызара батқан күн. «Шаңғы трамплинінің шыңында кездесу» дегеннің өзі қалай естіледі!

Fika мейрамханасы тәуліктің кез келген сәтінде еуропалық лофт нақышын еске салады: стильді интерьер, иісі мұрныңды жаратын нан өнімдері бар сөрелер, өнер туралы кітаптар. Кездесу рецептісі оп-оңай — молынан май жағылған нан, арнайы авторлық тағам және көпшілікке танымал бір бөтелке шарап. Кейін ноутбукті қолға алып, бірлесіп бір креативті жоба ойлап табыңыз. Бірақ кім білсін…

Гранд-кафе форматы көңіліңе бірден шаттық пен тебіреніске толы шымырлаған мерекелік сарын сыйлайды. Маңызды іс-шараны дүркіретіп думандататын жер. Богемалық интерьерден бөлек, Astra мейрамханасының атап өтуге тұрарлық басқа да артықшылықтары бар: Петербургтің танымал наубайшысы Максим Бабичтің жетекшілігімен әзірленген балғын пісірмелер, мәскеулік шеф Георгий Троянның фэнси-асханасы, Көкшіл Жағалау бойымен жүріп өткен саяхатшының жазбаларына ұқсатып жасалған коктейль картасы. Ал төменгі қабатқа түссеңіз, Agora ұжымының коктейль барында «Ұлы Гетсбидегідей» түні бойы көңіл көтере аласыз.

«Қымбаттым, Альпіге кеттік!» дегенді естігенде қуанбайтын жан жоқ шығар. Өзіміздің алматылық Альпіміз болса да. Rifugio del Monte «таудағы там» деп аударылады. Солтүстік Италияға тән эстетиканы жеткізе білген бұл мейрамхана «Шымбұлақ» станциясынан сәл алшақта — жанталасып шаңғы теуіп жүрген жұрт арғы жақта қалып, тым-тырыс тыныштық басталатын жерде орналасқан. Террасадан көрінетін таулы пейзажда туристер түгілі, бір жан жоқ, ал сыр қосылған фондю, устрица, паста және шампан дастарқаныңызға сән береді.

Wine Spectator «екі бокалын» иеленген шарапхана-бар — шарап сүйгіш екі эстет үшін таптырмас орын. Шарапты күштілігі, жеміс немесе емен дәмінің қанықтығына қарап таңдау міндет емес; зодиак белгісіне немесе танысу оқиғасына сай бөтелкені таңдап беруді сұрасаңыз болады — ондағы білгір сомельелер кімнің болса да көңілінен шығады.

Шевченко көшесінде орналасқан Monte Bianco шарап дүкенінде кешкі ас ішетін кішігірім зал мен жап-жақсы итальян мәзірінің бары көпшілікке беймәлім. Ал сіз енді білесіз. Үйдегідей атмосфера, қызмет деңгейі керемет: пастаның бір порциясы екі адамға жетеді, шараптардың дәмі де, бағасы да көңілге қонымды, ал десертке еуропалық ірімшіктер мен шұжықтарды көз алдыңызда турап, үйіп-төгіп береді.

Көк базардан төменірек жердегі автожууда орналасқан, екінің бірі біле бермейтін құпия орын азиялық афтепати атмосферасына бөлейді. Түрлі тағамдарды алып, бір-біріңіздікін көрсеңіз болады: фо-бо мен рамённың үлкен порциялары қарынды да, көңілді де тойдырады. Тағы бір қуантатын жаңалық: «Сёсёнің» алкогольсіз коктейль картасы The World’s 50 Best Bars тізіміне енді. Бұл бұрын-соңды болмаған жағдай — сыйақының шорт-тізіміне алғаш рет алкогольсіз мәзір қосылды.

Кездесуді қалай ерекше етуге болады? Мысалы, картопсыз және тұздықсыз дөнермен! Аң-таңсыз ба? Ал қасына тағы ешкі сүтінде маринадталған сиыр еті (тауық емес) мен үй айранын қоссаңыз — сүйіктіңіздің жүрегін жаулап алдым дей беріңіз.

Бірге тамақ дайындау қос ғашықтың арасын жақындатып, махаббатын нығайта түседі. Кореядағыдай мейрамханада өз қолымен тамақ дайындау форматы Massiso мейрамханасында да қолданылады: онда арнайы жабдықталған BBQ үстелі бар, барлық қажетті ингредиенттер мен нұсқаулықтарды өздері береді. Салат жапырағынан ет пен топпинг салынған орама жасап көруге кеңес береміз.

Кездесу тек кешке болады деп кім айтты? Таңертеңгі күн шуақта сүйіктіңізбен дастарқан басында кездесуден басталған жұмыс күнінің сәтті өтетініне күмән жоқ. Ағылшын таңғы асы, крок-мадам, сүзбелі құймақ, круассан — «Аврора» мейрамханасының екінші қабатында ғашығыңызбен дәмді таң рақатына бөленіңіз.

Желілерде таралып кеткен мемдегідей: қыздар — кілегей қосылған құлпынай жегім келеді десе, әйелдер маған еті мол чебурек, шие салынған арақ әкел де, жастық шағымыздағы әнді қой дер еді. Егер ер жетіп, бой жетіп, өзінің керемет өмірін қарапайым жолмен құрып жатқандардың қатарынан болсаңыздар, бұл жерде болашағыңыз жарқын болатыны сөзсіз.

Париждегілерден кем түспейтін кондитерлік наубайхана! Дәстүрлі француз рецептері бойынша әзірленген ыстық пісірмелер, тойымды әрі тәтті тоқаштар — нағыз глютен әлемі. Әр тағам түрінен аз-аздан алып көріп, ұнайтынын бірге табыңыз (міндетті түрде демибагеттер мен круассандарды көріңіз). La Croute іші тар десеңіз, өзіңізбен алып кетіп, Президент саябағында жайлы пикник жасасаңыз болады.

Syn32 мейрамханасының шефі Абдулла Амин айтқандай — тау басында жұмыс істеу оңай емес. Дегенмен таудың таза ауасында ас жеңіл сіңеді. Ал әбден шаңғы теуіп болып, тәбетің ашылғанда тамақтанғанға не жетсін! Орталық Азия бойынша ең биік таулы жердегі бұл мейрамханада нағыз après ski атмосферасын тамашалай аласыз. Сүйіктіңізбен бірге фирмалық қазақтори кәуаптары мен бургерлерден дәм татып, ұлы тау басында ұлы махаббат үшін коктейльден алыңыз.