Президент саябағында жақында ашылған Sichou жоғары деңгейдегі қытай асханасының мейрамханасы атануға талпынып отыр. Шеф Итан Дуан мәзірде Сычуань мен Хунань асханаларының бар ерекшеліктерін көрсетіп, тәжірибе жасауды да ұмытпаған. Мүкжидек пастиласындағы фуа-гра, шаньдунша ащы қуырылған тауық еті, көне Бейжің тәсілімен дайындалған ет бәліші — мұндағы кешкі ас, кем дегенде, қызық өтетіні анық. Міндетті түрде татып көруге кеңес беретін тағамдардың қатарында чили, пияз, зімбір, кардамон, күріш шарабы мен бал қосылып, вокта баяу бұқтырылған дөңмаңдай балықтың басы бар. Сондай-ақ көне Бейжің тәсілімен дайындалатын қытырлақ қуырылған сиыр етін атап өткен жөн, оны тахини пастасы және бір уыс дәстүрлі дәмдеуішпен бірге жұп-жұқа соя жапырағына орап ұсынады. Ал жеміс ағашының отынына қақталып, уылдырықпен ұсынылатын Бейжің үйрегінен дәм татпай кету — гастрономиялық қылмыспен тең.
Kantin атауы түрік тілінен «дәмхана» (буфет) деп аударылады. Ботаникалық баққа қарайтын жаңа кофехананы ҚТЛ (Қазақ-түрік лицейі) түлектері ашқан. Табалдырықтан аттаған бойда заманауи технологияларға басымдық берілгені байқалады: мәзір LED-панельдерден көрсетіледі, ал сусындардың бір бөлігі аустралиялық Six Simple Machines жүйесі арқылы әзірленеді. Ыстық батч-брю, колд-брю және маусымдық сусындар краннан бірден құйылады. Кофе мәзірінде бұлардан бөлек эспрессо, фильтр-кофе, бамбл және матчаның бірнеше түрі бар. Авторлық сусындардың арасынан сүтті пина колада, убе қосылған матча мен шие пуншын табуға болады. Сөреде тарталеткалар мен тәтті тіскебасарлар, сондай-ақ доктор шұжығы қосылған тост-сэндвичтер ұсынылған. Соңғысы — мектеп асханасына деген ишара.
Tata — бәліштер мен десерттерді аутизмі бар қызметкерлер әзірлейтін инклюзивті наубайхана-кондитерлік. Жобаны Darmed клиникалар желісінің басшысы Айгүл Ешматова ашып, ұлының күтушісінің құрметіне Tata деп атаған. Кондитерлік цехты École Nationale Supérieure de Pâtisserie мектебінің түлегі Ілияс Досанов басқарады. Сөреден «Наполеон» тортын, карамельді және пістелі бал торттарын, пісте, нутелла, даршын қосылған алма және жидек салмасы бар синнабондарды, сондай-ақ крамбл-кукистерді табуға болады. Әлеуметтік желілерде команда асүйде болып жатқан үдерісті ғана емес, қызметкерлердің өзін де таныстырып, аутизм туралы кең тараған жаңсақ түсініктерді талдап, жоққа шығарады.
Table ұстанған тұжырымдама қарапайым әрі түсінікті. Оны әлеуметтік желідегі парақшасының сипаттамасында тұрған бірнеше сөз дәл жеткізеді: we do coffee, matcha and breakfast. Мұнда күн сайын қолдан пісірілген фокаччадан сэндвичтің төрт түрі дайындалады: пастрами, тунец, мортаделла және бекон қосылған. Оларға кофе классикасын, батч-брю, пуровер, колд-брю, матча немесе ходзича алуға болады. Table-ға үй жануарларымен бірге келетін қонақтарды да қуана қарсы алады.
Фото: мейрамханалардың сайттары мен әлеуметтік желілері; Yandex Maps
